තරු ලකුණක්ද ? ගිනි දළුවක්ද ?

විරහ කඳුලැලි ගඟක පාවී

වියෝ දුක් ගිනි සුළ රැ‍ල‍්ලේ

අතරමං වී ඔහේ පාවී

පාළු නිම්නෙට ඇදී ආවෙම්...

මගේ දුක් ගිනි මටම පවරා

අනුන් දුක් ගිනි නිවනු රිසියෙන්

ලොවේ යහපත නිසා කැප වී

ජීවිතේ දිගු කලක් ගෙව්වෙම්....

සැනසුමෙන් දිවි ගෙවෙන අතරේ

හුදකලාවම මිහිරි සැපකැයි

සිතා දිවි මග තනිව යන්නට

පෙර දවස මා පැතුම් පිරුවෙම්....

නොසිතු මොහොතක සෙමින් පතිතව

ප්‍රේමයේ නව අරුණු දහරක්

හුදකලා ලොව එළිය කරනට

මෙත් සිතින් අද කරයි ඇරයුම්.....

අවසරයි හද දොර අරින්නට

හදේ සපුරා ලැගුම් ගන්නට

ජීවිතේ දිගු ගමන යන්නට

ආදරේ තරු ලකුණ වන්නට.....