ඒ ප්‍රේමයේ නින්නාදය 'තරු ඇස් රහස්'

බිඳී බිඳී ඉහිරෙන සිහින අතර, අත්තටු පැළැන්ඳෙන සිහිනයක් යනු අසිරියක් ම නොවන්නේ ද?

මුදු මද අඳුරක් පැතිර ගිය අහස් තලය මත පෑයු පුංචි තාරුකාවක් මඳහසක් නගන්නේය. ඒ තරු ඇස සැඟවුණු රහස මම දනිමි. කවියට පෙම් බැන්ද බාල සන්දියේ සිට ම සිතේ පැතුමක් ගුලි ගැහී තිබූ බව ඒ තරුව දනී. පියාපත් ලැබ සුවිසල් අහස සරනු සඳහා මේ බිනර මහේ පෙරමං බලන්නේ ඒ මගේ දිවියේ අහිංසක පැතුම ය. සොඳුරුතම සිහිනය ය. 

ඉදින් මේ මගේ පළමු පොත ය. හැමදාමත් ජීවිතේ තනි නොතනියට හිත ළඟම හිඳින්නේ කවිය බැවින් කුළුඳුල් කෘතිය කවියට ම වෙන් කළෙමි.

මගේ කවි පොත, ‘‘තරු ඇස් රහස්” අපේ කවි පොතක් වන්නේ සම ප්‍රකාශන අසම සම දයාබරත්වය තුළ නව උත්පත්තියක් ලබන බැවිනි.

දුල් මල් විල් මෙන් ම ගල් මුල් ද සෙනෙහසින් බාර ගනිමි.

කවියට මෙන් ම, ජීවිතයට ද ප්‍රේමයෙන් පණ දුන්නෝ බොහෝ වෙති. ස්තූතියි කීම එකී ප්‍රේමය ලඝු කිරීමකි. එබැවින් මෙලෙස කියමි.

‘‘ඔබ මට දුන් සෙනෙහස පෙරළා ලොවට තිළිණ කරමි. 'තරු ඇස් රහස්' ලෙසින් මුද්‍රිත අවකාශයෙහි පියාපත් පළඳින්නේ ඔබ මවෙත පුද දුන් ස්නේහයේ නින්නාදයයි. අද මෙන් හෙටත් මා සමඟ හිඳිනු මැන..”