මැජික් කෝප්පේ මුතු කඳුළු

'' එදාම රාත්‍රියේ මම මගේ මුල්ම කෙටිකතාව ලීවෙමි. මට ඊට මිනිත්තු තිහක් ගත විය. එය මැජික් කෝප්පයක් සම්බ වූ මිනිසෙකු පිළිබඳ කි‍යැවෙන දුක්බර කෙටි කතාවකි. තමා ඒ කෝප්පය තුළට මුහුණ දමාගෙන හැඬුවොත් සිය කඳුළු මුතු බවට හැරෙන බව ඔහුට දැන ගන්නට ලැබෙයි.

හැමදාමත් දුප්පත් වී සිටියත් ප්‍රීතිමත් මිනිසෙකු වූ ඔහු කඳුලක් හෙළුවේ කලාතුරකිනි.

ඒ නිසා සිය කඳුළුවලට තමා ධනවතකු කිරීමට හැකි වනු පිණිස ඔහු තමා දුක්බර කිරීමේ ක්‍රම සොයා ගනියි...... මුතු ගොඩ ගැසෙද්දී ඔහුගේ තණ්හාවද වැඩි වෙයි.

කතාව අවසන් වන‍්නේ පිහියක් අතින් ගෙන, සිය ආදරණීය බිරිඳගේ පණසුන් ශරීරය දෑතේ හොවාගෙන, කෝප්පය තුළට කඳුළු වැටෙන සේ අසරණව වැළපෙමින් මුතු කන්දක් මත වාඩි වී සිටින මිනිසාගෙනි. ''

------------------------------------ef-------------------------------------

ලංකාවෙ අපිත් හරියට මේ මෝඩ මිනිහා වගෙයි කියල මට හිතෙනවා... ස්වභාවික සම්පත්, හොඳ ගුණධර්ම, ඉහළ ශිෂ්ටාචාරයක් තිබුණ අපිත් ඒ හැමදේටම වඩා ධනය, බලය, නිලතල නම්බු නාම, දියුණුව පස්සේ පන්නගෙන ගිහින් දැන් වටිනාම දේවල් අහිමි කරගෙන, ලබා ගත්ත දේවල් භුක්ති විඳින්නත් බැරිව වැළපෙන මේ අසරණ නර පණුව වගෙයි... මුතු හොයාගෙන ගිය ගමනෙදි අපි වැඩියක්ම එකතු කරගෙන තියෙන්නෙ කඳුළු නේද කියල හිතෙනවා අපේ සමාජය ශීඝ්‍රයෙන් පිරිහීගෙන යන හැටි දකිද්දි...

තණ්හාව ශෝකයට මුලයි කියන බුදු වදන සිහි වෙනවා මේ කතාව බලද්දි.. මනඃකල්පිත කතාවක් උණත් හිතන්න ගොඩක් කාරණා තියෙනවා....

මම මේ කතාව උපුටා ගත්තෙ මෙන්න මේ ‍පොතෙන්....

     කෘතිය                    :- සරුංගල් ලුහුබඳින්නා ( The Kite Runner )

     කර්තෘ                     :- ඛලීඩ් හොසෙයිනි

     පරිවර්තනය            :- ගංඟා නිරෝෂණී සුදුවැලිකන්ද

     ප්‍රකාශනය                 :- විජේසූරිය ග්‍රන්ථ කේන්ද්‍රය

     මිල                         :- රු. 480

 

තවම පොත කියවන්න පටන් ගත්තා විතරයි.. මුලින්ම පොතේ කවරය.. ඉන්පස්සෙ අනිත් පැත්ත හරවල පිටකවරය... ඊළඟට මුද්‍රණය ගැන තියෙන විස්තර, කර්තෘගේ වෙනත් කෘති, පෙරවදන් ආදි වූ විස්තර මේ සියල්ලම බලල තමයි කතාව බලන්න පටන් ගන්නෙ....

පොත හරිම රසවත්.. වගේම අර්ථවත් කියල දැනෙනවා... ඇෆ්ගනිස්ථානයේ මීනා ගැන ලියවුණු පොත කියෙව්වට පස්සෙ ඇෆ්ගනිස්ථානයෙ ඉන්නෙ මගේ නෑදෑයො වගේ හැඟීමක් දැනෙනවා.. අන්තවාදී මුස්ලිම්වරුන් නෙවෙයි... තමන්ගෙම මිනිසුන්ගෙ විරුද්ධවාදිකම් සහ ඇමරිකන් ප්‍රහාර හමුවේ අසරණ වන ඇෆ්ගනිස්ථාන් මිනිසුන්... ඒ අය වෙනුවෙන් වැඩ කරන මීනා වැනි ධෛර්යවන්ත ඇෆ්ගනිස්ථානුවන්.. මේ අයයි මගේ නෑදෑයො...

ඇෆaගන් ජාතිකයෙක් ඉංග්‍රීසියෙන් ලියා පළ කළ ප්‍රථම නවකතාව මෙයලු.... මේ නවකතාව චිත්‍රපටයටත් නැගිල තියෙනවලු...