දඟකාර මහල්ලා

හරි අපූරු පොතක් කියවන්නට ලැබුණා... සිනා සාගරයක්... වැඩට යන එන ගමන් කෝච්චියෙදි තමයි පොතේ වැඩි කොටසක් කියෙව්වෙ... ඒ ගැන ඔයාල එක්කත් බෙදා ගන්නට හිතුණා... තනියෙන් හිනා වෙවී පොතක් කියවන මං ගැන අනිත් අය මොනා හිතුවද දන්නෙ නැහැ... කොහොම උණත් මේ පොත කියවද්දි හිනා නොවී ඉන්නත් අමාරුයි....

මේ පොතේ කතා නායකයා අවුරුදු 72 ක් වයසැති සීයා කෙනෙක්.. ඔහු චෞද්රී කුශ්වන්ත සිංහ.. ජීවිතේ බොහෝ කටුක අත්දැකීම්වලට මුහුණ දී සිටියත් ඔහු පුංචි දරුවෙක් වගේ නිතරම විනෝදෙන්, සැහැල්ලු සිතින් ඉන්න, ජීවිතේ විඳින්නට කැමති කෙනෙක්... ඔහු ජීවිතේ විඳින විදිය හරිම වෙනස්... එයින් තමයි කතාව තුළ හාස්‍යය මතුවෙන්නේ... සිනාව උපදින්නේ...

කෙනෙකුට හිතෙන්න පුළුවන් හරි මෝඩ කතාවක්නෙ... මේවත් වෙන්න පුළුවන් දේවල්ද, මේවට හිනා වෙන එකත් මෝඩ වැඩක් කියල..

අපි පුංචි කාලෙ ගමරාළ දිව්‍ය ලෝකෙ ගිය හැටි, අමල් බිසෝගෙ කතාව..... එතකොට රුසියන් සුරංගනා කතා රස කර කර කියවනවා නේද? අහනව නේද? ඒ කොයිම වෙලාවකත් මේවත් වෙන්න පුළුවන් දේවල්ද කියල හිතන්නෙ නැහැනෙ...

පුංචි අපේ හිත් ඒ කතාවල රසයෙන් අමන්දානන්දයට පත් වෙනවා... ඒ වගේ වෙන්න පුළුවන් දේවල්ද කියල සැක හිතින් නැතිව පිරිසිදු සිතින් සිනාවට ඉඩ දෙමින් කියෙව්වොත් නම් මේ කතාවෙ අපූර්වත්වය විඳ ගන්න හැකි වේවි....

ආබිද් සුරති 

ආබිද් සුරති කියන හින්දි ලේඛකයාගේ “ බහත් සාර් සාල් කා බච්චා” පොතේ නම... මම හින්දියෙන් කියවන්න නම් දන්නෙ නැහැ.. පොතේ සිංහල පරිවර්තනයක් තියෙනවා “ දඟකාර මහල්ලා ” නමින්... ඒ දඟකාර මහල්ලාව තමයි මේ දවස් ටිකේ මම ඇසුරු කළේ....

මේ තියෙන්නෙ හින්දි පොත 

වෙන්ට ඕන...

පොතේ නම      - බහත්තර් සාල් කා බච්චා

කර්තෘ               - ආබ්ද් සුරති

සිංහලට             - දඟකාර මහල්ලා

පරිවර්තක         - ඩී.පී. සමරසිංහ

ප්‍රකාශනය         - විජේසූරිය ග්‍රන්ථ කේන්ද්‍රය

මිල                   - රු. 200.00

( අගනා පොත පත ගෙනත් දෙමින් මගේ පොත් පිපාසය සංසිඳවන්නට බෙහෙවින් උපකාර වන නිර්මලා නංගීට හද පිරි ස්තූතිය. )