සරසවියේ කුරුටු කවි

සරසවි ජීවිතේ විරාමයක ලියවුණු පුංචි කවි කිහිපයක්.... ( කාල අවකාශය 2000 - 2004 )

එතෙර ගිය බිරින්ඳෑ මෙතෙර ආදා

ගං දෑල අසබඩට එන විට මම

හබලද අතැතිව

වරපට ළිහී ඔරු කඳ

රළු ජල පහරට මැදිව

ගං දියඹට පාවී

ඈතට ඇදී ගිහින්...

.....................................š›..........................................

ලොකු අක්කා

වැහි අඳුරු අහස යට

දිදුලන තරු කැටය

හිනැහෙන අපූරුව

මියැදුණත් හඳ මඩල

නොයා තනිකර අහස

.....................................š›..........................................

සතුරු මිතුරු

කුහකය මුළු ලොවම

මිතුරු වෙසිනි සතුරෝ

පැණිය කියා ලේබලය ඇති මුත්

විසමය ඇතුළත

මරණය ගෙනෙන

හඳුනා ගත්තේ

තොල ගෑ පසුවය....

.....................................š›..........................................

ප්‍රාර්ථනා

අධිබල විදුලි රැහැන මත

චුට්ටං බට්ටිත්තෙක්

දෙපයින් හිටගෙන

පණසුන් තඩි වවුලෙක්

ඒ අසලම රැහැනේ

එල්ලීගෙන...

.....................................š›..........................................

සරසවි ජීවිතේ

කෙමිබිමක් සොයන්

මරු කතර මැදින්

මිරිඟුව දකිමින්

හති ලා දිව යම්..

.....................................š›..........................................

අම්මාවරුන්ගේ දිනය

ගොන් කිරි බී

හැදු දරුවන්

මව් ගුණ ගී

ගයන වගයි...

.....................................š›..........................................

ප්‍රේමය සහ නුඹ

අරුණැල්ලක්ව පිබිද අවුත්

මද්දහනක ගිනියමින් දවා

පඬුපැහැ හැන්දෑවක

අවරගිරින් සැඟව ගියා....

නමුදු ගිරි සිරස සියල්ල දරා

එදා වාගේ අදත්

නොසැලීම උන්නා..

හංග ගත් කඳුලක් උල්පතක් වෙලා

සිහිල සුව සදමින්

ඈතට ඇදී ගියා....

.....................................š›..........................................

රණවිරු පෙම්වතියකගේ ප්‍රේමය

හුදකලා පාළු සොහොනක

නැවුම් පස් කණ්ඩියක් මත

සුදෝ සුදු අරලිය මලක්

වැතිර තිබෙනු

බොහෝ කලකට පෙර

දුටු බව මතකය....