ඔව්!!! ඒ සමනල්ලු සිරිපාදේ නොයති,

ලේ ඉහුණු බිම්කඩක

මල් රොන් සුණු සුවඳ

ඉව කරනු කෙලෙසක...

දූවිලි ෂෙල් වැකුණු

අතු ඉති කටු තුඩු මත

මලක් වුව නොපිපීම

කවර නම් අරුම ද...

කාෂ්ටක මඟ දිග

අඳුරු ළඳු දෙනි මැද

කුමක් නම් සොයන්නෙද

ඒ පුංචි සමනල්ලු...

අත් නොහැරි අත්බවෙක

අතරමඟ විසිකෙරුණු

දුෂ්කර ම ජීවිතය

හැර නොයා දිනන්නට

කියා දෙන දුයිෂෙන්

කවුරුන්ද?

පියාපත් එපමණ ම

සවි ඇද්ද?

නන්දිකඩාල්

කලපුවෙන් ඔබ්බට

කය දුෂ්කර ප්‍රාර්ථනාව*

මුමුණන්නෙද නිහඬවම

රෑනින් රෑන සැරිසරන

ඒ පුංචි සමනල්ලු...

සේයා - ලාල් ලක්ෂ්මන්

නවම් පොහොය දා අපි වව්නියාවේ ඉඳන් වලෙයිපාඩු දක්වා දුර ගමනක් ගියා. කඩිනම් දුෂ්කර ගමනක්. ගියා නොගියා සෙයින් ගිහින් ආ ගමනක්. දරුවන් වෙනුවෙන් ආදරය අරන්... 

පල්ලවරායම්කට්ටුව හන්දියෙන් හැරුණු තැන සිට අබලන් ගුරු පාර දෙපස දිගටම රෑන් රෑන් පුංචි සමනල්ලු උන්නා. සුදු පාට, කහ පාට, අලු පාට සමනල්ලු. නිමක් නැතිවම.. දිගටම.. පේන මානෙක මලක් නොවුණට, මඟ දිගටම සමනල් රංචු. හරියට අපිව පිළිගන්න වගේ, එහෙමත් නැත්නම් අපට පේන්න වගේ... එහෙමත් නැත්නම් මොනවදෝ නැති වුණ දෙයක් හොයනවා වගේ...

මට තාමත් මතක් වෙනවා, ඒ පුංචි සමනල් රංචු...

.......

*කය දුෂ්කර ප්‍රාර්ථනාව කියන්නෙ ජේසුගේ දුක් විඳීම සිහිපත් කරන උච්ච ස්වරයෙන් ගැයෙන විලාප ගී ගායනාවක්. ජේසුතුමන්ව පාවා දීමේ සිට මරණය දක්වාම වන සිදුවීම් එකින් එක මෙහිදී ගායනා කරනවා. ඒ මරණයට අපත් වගකිව යුතු නේද කියන පසුතැවීම සහ සමාව යැදීමේ පශ්චාත්තාපී කොටසකුත් එයට ඇතුළත්. කය දුෂ්කර ප්‍රාර්ථනාව ගද්‍යමය ගායනාවක්. කවි ගායනාවක් නෙවි. ඒක තමයි විශේෂත්වය. 


මෙය ජාකෝමේ ගොන්සාල්වෙස් පියතුමා රචනා කළ දේශනා නවයේ පසම් පොතෙහි එන්නක්. කය දුෂ්කර ප්‍රාර්ථනාව යූ ටියුබයෙන් අසන්න, මෙන්න ලින්කුව.....

 අතීතයේ අපේ ගම්වලත් චතාරික සමයට (පාස්කු කාලයට) පසම් ගායනා කෙරුණා. රැයක් එළිවන තුරු පසම් ගායනා කිරීම පුංචි අපට නම් ජේසුගේ දුක් විඳීම, මරණය මෙනෙහි කරන දුකින් පිරුණු රැයකට වඩා අසිරිමත් අපූරු රැයක් වුණ බව මතකයි.. ඒ ගැන වෙනම ලියන්න ඕන..

සේයා රූ - ලාල් ලක්ෂ්මන්