පිටු

Thursday, December 2, 2021

ජීවන චාරිකාවේ අත්හැරුණු ප්‍රේමයේ කතාව ‘‘මැහුම්කාරි“


සේයාරුව - ඉරේකා සෙනෙවිරත්න

අවිහිංසක දැරියකව සිටියදී නොකළ වරදක වින්දිතයකුව නිරපරාදයේ තමන් පිටමං කර දැමූ නගරයටම සොඳුරු ගැහැණියකව ඈ පෙරළා ගොඩ බසින්නේ තම මව වෙනුවෙනි. සැබවින්ම ඒ මව වෙනුවෙන්ම ද? සැමවිටම කොන් කළ, ප්‍රතික්ෂේපයට ලක් වූ බියගුළු දැරියකව සිටි මර්ටල් ඩනේජ් නම් වූ ඇය, ටිලී ඩනේජ් නම් වූ එකී දක්ෂ මැහුම්කාරිය, ජේත්තුකාර ගැහැනු ආත්මය දක්වා පැමිණි ගමන්මඟ කුමානාකර වන්නට ඇත්ද? ඈ කොතෙක් නම් බර ජීවන කුරුසියක් උර දරා සිටින්නට ඇත්ද?

ටිලීගේ පුනරාගමනය - චිත්‍රපටයේ දසුනක්

ඩන්ගටාර් නගරයෙන් ඔබ්බේ වූ හුදෙකලා කන්දේ එකලාව එල්ලී තිබු අබලන් නිවසේ රැඳී උන් වියපත් උන්මාද ගැහැනිය මොලී සිය දියණියගේ පුනරාගමනය පිළිගන්නට තරම් පියවි සිහියක නොවූවාය. යෞවනයේදී ම ප්‍රේමයේ මායාවෙන් මුලා කර දැමූ, එනයින්ම සිඟිති දියණියක සමඟ මං මුලා වූ, අවලං ගැහැනියක ලෙස සමාජයෙන් පවා ප්‍රතික්ෂේපයට ලක් වූ අසරණ ගැහැනියක වූ ඇය අහිමි වූ දියණියක මිස රුවැති ගැහැනියක දැකීමේ සිහිනයක නොවූවාද විය හැකිය. කාලයේ ගලා යෑම ඈ අබියස මිදී, ගල් වී පැවතියේ බොහෝ කලකට පෙරදීමය. දියණිය ඇගේ සෙවණින් උගුලුවා හැර දුර ඈත නගරයක හුදෙකලාවක ගිල්වා දැමූ සමයේදීම ය.

The Dreesmaker චිත්‍රපටයේ දර්ශනයක් - ටිලී සහ මව මොලී


කිසිදු අපූර්වත්වයකින් තොරව රළු පරළු මිටියාවතක අලසව ගලා බසිනා දොළ පාරක් වන් ඒ කුඩා නගරයට ටිලී ඩනේජ් පෙරළා පැමිණෙන විට කුමන කුණාටුවක් ඈ පසුපස හඹා එනු ඇත්දැයි නොදත් නගරවැසියෝ සුපුරුදු දෛනික චර්යාවන්හි නිද්‍රාශීලිව ඇලී ගැලී උන්හ.

තැබෑරුම ද, පාපන්දු පිටිය ද නොවන්නට ඩන්ගටාර් නගරය ද කාලයේ රළු සැමිටියෙන් තැලුම් කා අඩපණව ගිය වියපත් මැහැල්ලක සේ දිස්වන්නට තිබිණි.

අන්ධකාර සෙවැණැලි සේ ඩන්ගටාර්හි නිවෙස්, කඩසාප්පු, මංමාවත් අතර එකෙල මෙකෙල වෙමින් සිටි ඇල්මැරුණු ගැහැනු ආත්ම පණ පිහිටුවාලන්නට ටිලී ඩනේජ්ගේ අපූරු ඇඳුම් මෝස්තර රටාවන්ට හැකි නොවී ද? පැරිස් නගරයෙන් උකහාගත් මෝස්තර නිර්මාණ ශිල්පයේ දැනුම ද, ටිලීගේ ප්‍රතිභාන්විත අපූරු ඇඳුම් මෝස්තර රටා ද ඩන්ගටාර් ගැහැනු ශරීරයන්හි එති එතී බාහිරයෙන් අතිශය චිත්තාකර්ෂණීය දීප්තියක් මතු කළද, අභ්‍යන්තරයෙන් ඔවුන් තුළ පැවති මාන්නක්කාර, කුරුරි, අශෝභන ගති ලක්ෂණ පළවා හරින්නට කිසිසේත් සමත් නොවීය.

බිඳී ගිය සබැඳියාවන් යළි ගොඩ නගමින් සන්සුන්, සාමකාමී දිවි පැවැත්මක් වෙනුවෙන් ටිලී ඩනේජ් තුළ අපමණ අපේක්ෂාවන් නොවී යැයි යැයි සිතිය නොහැකිය. ටෙඩී මැක්වයිනි සමඟ ප්‍රේමයෙන් වෙළී යන විට ද නව ජීවිතයක් පිළිබඳ අපේක්ෂා ඈ තුළ නොවී යැයි සිතනුයේ කෙලෙසින් ද?

නමුත් ඩන්ගටාර් නගරය වෙනස් වී තිබුණේ නැත. අවජාතක දැරියක ලෙස හංවඩු ගැසී සිටි ඇයට දක්ෂ මැහුම්කාරියක වූ පමණින් නගරයේ මුල් ඇද ගන්නට හැකියාවක් නොවුණි. කෙසේ නමුත් මුල, මැද, අග පැටලුණු මං මුලාවක සිටි නගර වැසියන්ට ඇය සදාකාලික සාපයක් ලෙස මිස ආදරය සොයා යන තවත් මනුෂ්‍ය ආත්මයක් ලෙස හඳුනා ගන්නට කිසිවිටක නොහැකි විය. ඉදින් ජීවිත කාලයක් සිය මවත්, තමාත් විඳ වූ ඒ සදාකාලික සාපයේ තරම පෙන්වා දෙන්නට ටිලී ඩනේජ්ට විටෙක සිතුණේ නම් එහි අරුමයක් නොමැත.

‘මැහුම්කාරි‘ය ත්‍රාසය, උන්මාදය, ආදරය, වෛරය ආදී හැඟම් සංකලනයක අපූර්ව වියමනකි. එය කිසිදු හැඟුමකට පාඨක මනස තදින් ආලෝලනය වන්නට ඉඩ හරින්නේද නැත. හැඟුමින් හැඟුමට සිදුවීම් පොලාපනින්නේ කඩිනමිනි. විටෙක පැටලුම් සහගත අවුල් ජාලකය පාඨකයා අතරමං කරමිනි.

පැටලුම් ලිහී යන්නේ අවසානයේ දී ය. නමුත් ඒ වන විට තවදුරටත් පෙර පැවති ඩන්ගටාර් නගරය නොවේ. පවතින්නේ දැවී හළු වී ගිය නෂ්ටාවශේෂ රැසක් පමණි. ඩන්ගටාර් වැසියන්ට ඉතිරිව තිබුණේ ඇඳි වත පමණි.

එය ද ටිලී ඩනේජ් විසින් නිර්මාණය කළ රංග වස්ත්‍ර මිස ඔවුන්ගේම වස්ත්‍ර නොවීය.

ඩන්ගටාර් නගරයෙන් නික්ම යන ටිලී 


ඕස්ට්‍රේලියානු ලේඛිකාවක වන රොසලි හැම් විසින් රචනා කරන ලද The Dressmaker නවකතාව සිංහලට නගා ඇත්තේ අපගේ බ්ලොග් සහෝදරයකු, හිත මිතුරකු වන තිලකසිරි ඒකනායක විසිනි. මේ ඔහුගේ පළමු මුද්‍රිත පරිවර්තනය වන අතර, අතරින් පතර වන පරිගණක දෝෂ හැරුණු විට එක හුස්මට කියවන්නට හැකි රසවත් නවකතාවකි.

‘අපූරු පොත්‘ ප්‍රකාශනය කළ අපූරු පොතකි.

පොත් මිල දී ගැනීමත්, පොත් කියවීමත් තරමක් අඩු වී ඇති මෙවන් කාලවකවානුවක, කියවන පොතක් ගැන සටහනක් ලියන්නට කිසිසේත් හිත නොනැමෙන කාලයක.... අඛණ්ඩව යාවත්කාලීන වන බ්ලොග් මිත්‍රත්වයේ නාමයෙන් ‘මැහුම්කාරි‘ය ගැන උපන් සංකල්පනා සටහන් කර තැබූයේ ටිලී ඩනේජ්, මොලී, ටෙඩී මැක්ස්වයිනි ගැන උපන් භාවමය බන්ධනයෙන් මෙන්ම ඩන්ගටාර් වැසියන් කෙරෙහි උපන් සියුම් අනුකම්පාවකින්ද යුතුව ය.