අහිංසක යකෙක් ගැන සහෘද සංවාදයක්...

''තමන් මහ උජාරුවෙන් හිතන් හිටියට මං බොහොම නිදහස් කාන්තාවක්ය කියල, වෙනසකට තියෙන්නෙ තමන් බැඳිල ඉන්න ලණුව ටිකක් දිග වැඩි එක විතරයි....''

පපු කුහරෙටම ඇඟිල්ලෙන් ඇනල, ඔලුව අත ගාලා ටොක්කකුත් ඇනල එහෙම කිව්වෙ සෝර්බා... 

'' ඇත්ත සෝර්බා...... ඒ ලණුව මං ම බැඳ ගත්ත  එකක්.. කපල දාන්න ඕන.. ඒත් ඒකට හිතට හයියක් නෑ... ඒත් දවසක මං ඒක කපන්නම්...'' මං කිව්වා. අධිෂ්ඨානයක් අරමුණක් ඇතිවම නෙවෙයි.. පුංචි බලාපොරොත්තුවක් ඇතිව.. 

''ඒක අමාරු වැඩක්... බොහොම අමාරු වැඩක්.. ඒකට තරමක මෝඩකමක් ඕනෑ..'' මහ හයියෙන් හිනාවෙලා සෝර්බා කිව්වෙ ඔච්චමට වගේ.. ඒ හිනාව සාධාරණයි. මොකද සෝර්බා දන්නවා කවදාවත් මං ඔය ලණුව කපා ගන්නෙ නැති බව.... ස්වර්ගය තියෙන්නෙ ඔය ලණුව කෙළවරය කියල හිතන් ඉන්න කෙනෙක් කොහොමද එහෙම කරන්නෙ...

''මං රටෙනුත්, පූජකයන්ගෙනුත්, සල්ලිවලිනුත් බේරුණා...

මං තවත් හුඟක් දේවල්වලින් බේරි බේරි ආවා...

ඒ විදියට තමයි මගේ බර සැහැල්ලු කර ගත්තෙ.

මම - කොහොමද ඒක ‍තේරුම් කරන්නෙ ?                                                 

මගේ විමුක්තිය මම ම හොයා ගත්තා...

මං මිනිහෙක් වුණා..!!''

සෝර්බා අහිංසක යකා එහෙම කිව්වෙ බොහොම සැහැල්ලුවෙන්... ඔය කියන කිසිම බැම්මකින් ලෙහෙසියෙන් ගැළවෙන්න පුළුවන්කමක් නැති, හයියක් නැති, ඕනකමක් නැති අපිට මිනිස්සු වෙන්න කවදා හැකි වෙයිද?

සෝර්බා මට හමුවුණේ ''සෝර්බා නම් ග්‍රීකයා'' කෘතියෙන්... සැබවින්ම අහඹු සුන්දර හමුවීමක්..  පල්ලියෙන් පිටුවහල් කළ ග්‍රීක ලේඛක නිකෝස් කසන්සාකිස්ගේ Zorba the Greek  කෘතිය සිංහලට පරිවර්තනය කළේ සද්ධාතිස්ස වඩිගමංගාව විසින්. ඒ 2000 වසරෙදි. එහි දෙවන මුද්‍රණය නිකුත් වෙන්නෙ 2013 වසරෙ සම ප්‍රකාශනයක් ලෙසින්...

සද්ධාතිස්ස වඩිගමංගාව

''සෝර්බා නම් ග්‍රීකයා'' කෘතිය පිළිබඳ විද්වත් කතිකාවක් පැවැත්වෙනවා  පුවත්පත් මණ්ඩල කාර්යාලයේදී.. ( බොරැල්ල කාසල් රෝහල ඉදිරි පිට )

2013 නොවැම්බර් මස 22 වන දින සවස 4.00 ට...

මාලනී ගෝවින්නගේ, දයා දිසානායක, කේ.කේ. සමන්කුමාර ඇතුළු විද්වත්, සහෘද පිරිසක් මේ සෝර්බා ගැන ශෝභාමත් කතාබහට එක් වන්නට නියමිතයි.. සංවිධාන කටයුතු සිදු වෙන්නෙ පුවත්පත් මණ්ඩල කාර්යාලීය දායකත්වයෙන්..

සෝර්බා සමග ආත්මීය සංවාදයට එක්වන්න විවෘත ඇරයුමක් තියෙනවා... අප සැමට...

.................................

''..... සෝර්බාත් බුද්ධත් එකට එකතු වෙනවා දකින්න මට අවශ්‍යයි. සෝර්බා තනිකර ගත්තම ඔහුගේ නැටුමේ සදාකාලික විශේෂත්වයක් නෑ. එය මොහොතක සැපත විතරයි. ඔහු ඉන් වෙහෙසට පත් වෙනවා. ඒ නිසා සෝර්බා සහ බුද්ධ එකතු වුණොත් විතරයි පරිපූර්ණ මිනිසා ගොඩනැගෙන්නෙ. 'සෝර්බා ද බුද්ධ' තමයි පිළිතුර. සෝර්බා ද බුද්ධ තමයි උසස් ම බලවේගය. සරලව කිව්වොත් සෝර්බාද බුද්ධ කියන්නේ

අලුත් නමක් අලුත් මිනිහෙකුට

අලුත් නමක් අලුත් යුගයකට

අලුත් නමක් අලුත් ඇරඹුමකට

සෝර්බා සහ බුද්ධ‍ගේ හමුවීම තමයි ඉතිරිව තිබෙන එකම ප්‍රාර්ථනාව..."

....ඕ‍ෂෝ...

නිකෝස් කසන්සාකිස්

Mihalis Kakogiannis අධ්‍යක්ෂණය කළ  Zorba the Greek චිත්‍රපටයෙන් ( 1964 )